பொடுகும், சைனஸூம் போயே போச்சு!

வணக்கம். இரண்டாம்நாளாக எனது புதிய பணி தொடர்கிறது. நேற்று (5.1.2011) விட்டதில் இருந்து தொடர நினைக்கிறேன்.. அதற்குமுன் ஒரு தகவலை சொல்ல விரும்புகிறேன். 2011‍ம் ஆண்டு எல்லோருக்கும் வளம் தரும் ஆண்டாக அமையும் என்று சொல்லக்கேட்டேன். அதில் எந்த அளவு உண்மை இருக்கிறதோ தெரியவில்லை. என்னைச்சுற்றி உள்ள சிலருக்கு சில நல்ல செய்திகள் கிடைத்திருக்கின்றன. ஏன், எனக்கும்கூட ஒரு மகிழ்வான நிகழ்வு.
சரி விஷயத்துக்கு வருகிறேன். பொடுகு பிரச்சினை, சைனஸ் தொல்லையை எப்படி எதிர்கொண்டேன் என்பதுபற்றி கூறுகிறேன். எனக்கு ஆங்கில மருத்துவ நண்பர்கள் நிறையபேர் உண்டு என்பதால் என்னென்னவோ சிகிச்சை செய்து பார்த்தேன், பலனில்லை. ஒருவழியாக மூலிகையின் துணையை நாடினேன். முதலில் சைனஸூக்கு வைத்தியம் செய்தேன். ஏனென்றால் பொடுகை ஒழிக்க செய்யும் சிகிச்சை சைனஸை அதிகரிக்கசெய்யும். ஆக, சைனஸுக்கு நொச்சி இலை வைத்தியம் செய்தேன். நொச்சி இலை சாறு எடுத்து அதில் நல்லெண்ணெய் கலந்து நன்றாக கொதிக்க வைத்து சூடு ஆறியதும் பொறுக்கும் சூட்டில் தலையில் தடவி அரை மணி நேரம் கழித்து சுடுநீரில் குளித்தேன். வாரத்துக்கு 2 நாள் வீதம் 2 மாதம் செய்தேன். மூக்கடைப்பு விலகி சைனஸ் கொஞ்ச கொஞ்சமாக குணமாயிற்று. ஆனால் தயிர், மோர் சேர்த்தால் எனக்கு ஒத்துக்கொள்ளாது. அதை மட்டும் சேர்த்துக்கொள்வதில்லை. எப்போதாவது சேர்த்துக்கொள்வேன். குளிர்ந்த சூழல் நிலவும்போது தயிர், மோர் சேர்த்துக்கொண்டால் தொண்டை கட்டிக்கொண்டு ஜலதோஷம் பிடிக்கும்.  உடனே சூடாக கொஞ்சம் வென்னீர் (சுடுநீர்) குடித்து அதன் வேகத்தை குறைத்துக்கொள்வேன். மற்றபடி இன்றுவரை சைனஸ் தொல்லை இல்லவே இல்லை.
சைனஸ் போன பிறகு பொடுகை விரட்ட... ஈருள்ளி எனப்படும் சின்ன வெங்காயத்தை அம்மியில் அரைத்தோ, மிக்சியில் அரைத்தோ அதனுடன் நாட்டுக்கோழி முட்டையின் வெள்ளைக்கருவை மட்டும் கலந்து  ஷாம்பு போல் ஆக்கிக்கொண்டு தலைக்கு தேய்த்து அரை மணிநேரம் கழித்து சீயக்காய் தேய்த்து குளித்தேன். சில வாரங்களில் பொடுகு போயே போச்சி. அதற்கு முன்பெல்லாம் தலைமுடியை உதறினால் செதில் செதிலாக கொட்டும். சின்ன வெங்காயம், நாட்டுக்கோழி முட்டையின் வெள்ளைக்கரு சேர்ந்த கலவையில் நல்ல வெற்றி கிடைத்தது. இதை பலருக்கு சொல்லி அவர்களும் வெற்றி கண்டிருக்கிறார்கள். இந்த சிகிச்சை முடி வளரவும் உதவும் என்பது கூடுதல் தகவல்.
நாளை வேறோரு தகவலுடன் சந்திப்போமா?